Basta — Page 422

shra (Shadan Dehlavi) Taqrib-e-shadi khana-abadi Shah-e-do-alam Amir-ul-Mominin Hazrat Ali ibn Abi Talib Hamrah Sayyida Nisa-il-Alamin Hazrat Fatima Zahra Likha hai main ne Shadan dilbar-e-Imran ka sehra Naye andaz ka sehra, naye unwan ka sehra Nirali waza ke ghunche, nirale rang ki kaliyan Nirali shan ka dulha, nirali shan ka sehra Nahin zauja kisi shauhar ki Masuma zamane mein Kisi ne bhi nahin bandha hai is unwan ka sehra Abu Talib ka beta hai to beti hai Khadija ki Hain donon Muhsin-e-Islam, hai ehsan ka sehra Khud is ko Bagh-e-Jannat se bana kar lai hain huren Farishton ne na dekha tha kabhi is shan ka sehra Har ek ghunche pe huron ne parhi Nad-e-Ali pehle Piroya surat-e-tasbih phir iman ka sehra Abu Talib ki mehnat ka samar bakhshta hai Khaliq ne Bari minnat ka sehra hai, bare arman ka sehra Hai khush-bakht Asad ki ruh Firdaus-e-Mualla mein Hua ham-naam Amina bandh kar iman ka sehra Agar Masum hai dulha to dulhan bhi hai Masuma Na dekhegi kabhi chashm-e-falak is shan ka sehra Jhukain sajde mein lariyan dekh kar dulha ke chehre ko Farishte dekh len khud aage ek insan ka sehra Jahan ilm-o-shujaat ek paikar mein sama jayen Isi ko zeb deta hai faqat mizan ka sehra Sar-e-ayat par khud jis ne dastar-e-amal bandhi Isi ke sar pe bandha Haq ne is elan ka sehra