Basta — Page 151
View
Roman Urdu
Urdu text
Muztar the shab-e-hashtum Zi-l-Hijja ko Shabbir
1
Muztar the shab-e-hashtum Zi-l-Hijja ko Shabbir
Tha qasd-e-musammam ke su-e-Kufa hon rahgir
Karte the kabhi yas se ro ro ke ye taqrir
Ab yan se kahan dekhiye le jati hai taqdir
Phir kar jo watan jayen to jana na milega
Ab hum ko bajuz qabr thikana na milega
2
The Sibt-e-Nabi koch ki tadbir mein us rat
Ki aa ke jo Ibn-e-Hanafiya ne mulaqat
Bhai se baghal-gir hue Shah-e-khush-auqat
Ki arz Muhammad ne ke ay Qibla-e-Hajat
Kufe ki taraf jane mein andesha-e-jan hai
Makke mein makin hon ke buzurgon ka makan hai
3
Hazrat ne kaha hota hun nachar rawana
Bhata hai kise apna watan chhor ke jana
Main be-kas-o-mazlum hun dushman hai zamana
Ab to hai Madine mein na Makke mein thikana
Hasid hai koi, dar-pay-e-azar hai koi
Hamid hai na koi, na madadgar hai koi
4
Munh pit liya sun ke Muhammad ne ye taqrir
Ro ro ke kaha gar hai yahi khwahish-e-taqdir
Namus ko chhoro yahin ay Hazrat-e-Shabbir
Hurmat se Haram rahen wo Sahib-e-Tathir
Pardes mein kya janiye kya jaur-o-jafa ho
Dar hai kahin Zainab na giraftar-e-bala ho
5
Zainab ki asiri ka sukhan sunte hi yak-bar
Tharra gaya dil, rone lage Syed-e-Abrar
Sunti thi ye taqrir jo sab Zainab-e-nachar
Mahmil se Muhammad ko pukari ba-dil-e-zar
Ki tum ne sifarish meri kya aah baradar
Bhai se bichharwate ho mujh ko wah baradar
6
Ye keh ke jo roi Asadullah ki pyari
Ibn-e-Hanafiya ke bhi ansu hue jari
Hazrat ne kaha bhai se ba-girya-o-zari
Bahnen meri qaidi hon ye hai marzi-e-Bari
Kat kar sar-e-Shabbir to neze pe alam ho
Pichhe khule sar qafila-e-Ahl-e-Haram ho
مضطر تھے شبِ ہشتم ذی الحجہ کو شبیرؑ
۱
مضطر تھے شب ہشتم ذی الحجہ کو شبیرؑ
تھا قصد مصمم کہ سُوئے کوفہ ہوں رہ گیر
کرتے تھے کبھی یاس سے رو رو کے یہ تقریر
اب یاں سے کہاں دیکھئے لے جاتی ہے تقدیر
پھر کر جو وطن جائیں تو جانا نہ ملے گا
اب ہم کو بجز قبر ٹھکانا نہ ملے گا
۲
تھے سبطِ نبیؐ کوچ کی تدبیر میں اُس رات
کی آ کے جو ابنِ حنفیہؑ نے ملاقات
بھائی سے بغل گیر ہوئے شاہِ خوش اوقات
کی عرض محمدؑ نے کہ اے قبلۂ حاجات
کوفے کی طرف جانے میں اندیشۂ جاں ہے
مکے میں مکیں ہوں کہ بزرگوں کا مکاں ہے
۳
حضرتؑ نے کہا ہوتا ہوں ناچار روانہ
بھاتا ہے کسے اپنا وطن چھوڑ کے جانا
میں بیکس و مظلوم ہوں دشمن ہے زمانا
اب تو ہے مدینے میں نہ مکے میں ٹھکانا
حاسد ہے کوئی، در پئے آزار ہے کوئی
حامد ہے نہ کوئی، نہ مددگار ہے کوئی
۴
منہ پیٹ لیا سُن کے محمدؑ نے یہ تقریر
رو رو کے کہا گر ہے یہی خواہشِ تقدیر
ناموس کو چھوڑو یہیں اے حضرتِ شبیرؑ
حرمت سے حرم رہیں وہ صاحبِ تطہیر
پردیس میں کیا جانیے کیا جور و جفا ہو
ڈر ہے کہیں زینبؑ نہ گرفتارِ بلا ہو
۵
زینبؑ کی اسیری کا سخن سنتے ہی یک بار
تھرا گیا دل، رونے لگے سیّدِ ابرار
سنتی تھی یہ تقریر جو سب زینبِؑ ناچار
محمل سے محمدؑ کو پکاری بہ دل زار
کی تم نے سفارش مری کیا آہ برادر
بھائی سے بچھڑواتے ہو مجھ کو واہ برادر
۶
یہ کہہ کے جو روئی اسداللہ کی پیاری
ابنِ حنفیہؑ کے بھی آنسو ہوئے جاری
حضرتؑ نے کہا بھائی سے با گریہ و زاری
بہنیں مری قیدی ہوں یہ ہے مرضیِ باری
کٹ کر سَرِ شبیرؑ تو نیزے پہ عَلَم ہو
پیچھے کھلے سَر قافلۂ اہلِ حرم ہو