Basta — Page 179

Jab lasha-e-pisar ko uthaya Husain ne 1 Jab lasha-e-pisar ko uthaya Husain ne Sine se lakht-e-dil ko lagaya Husain ne Ankhon se bahr-e-ashk bahaya Husain ne Ro ro ke ye bahen ko sunaya Husain ne Tir-e-alam jigar pe zaifi mein khaye hain Mayyat jawan bete ki hum le ke aaye hain 2 Ye sun ke Ahl-e-Bait mein mahshar hua ayan Daurin hawas-bakhta khaime se ala-bayan Masnad pe lash-e-Shah ne bithai ba-sad-fughan Mayyat pe gir ke Bano ye karne lagin bayan Kis ne mita diya mere naam-o-nishan ko Kis ki nazar lagi mere karil jawan ko 3 Awaz ek samt se aai hal-e-zar Jald aaiye Imam-e-Sher-e-Kirdigar Sunte hi is sada ke hue Shah be-qarar Khaime ke dar pe aaye jo Maula-e-namdar Dekha ke ek shakhs khara hai hawas hai Naqe pe wo sawar hai lekin udas hai 4 Shah ne kaha tu kaun hai ay gham ke mubtala Ye sun ke utra naqe se wo mard-e-bawafa Ki arz main hun khadim-e-aulad-e-Murtaza Shah-e-Halab ne bheja hai agah hai Khuda Deta hai jaan, shakl-e-Payambar ke waste Kuchh tuhfe us ne bheje hain Akbar ke waste 5 Ro kar kaha Husain ne Akbar to mar gaya Tuhfe ka lene wala jahan se guzar gaya Hum se bichhar ke aaj wo Dada ke ghar gaya Piri mein wo jawan hamein barbad kar gaya Sunta hai tu jo khaime mein ghul-o-shain ka Matam ye ho raha hai usi nur-e-ain ka 6 Daulat hamari lut gayi atharah sal ki Mayyat pari hai khaime mein Bano ke lal ki Khun mein bhari hai shakl mere mah-e-jamal ki Shadi bhi na pai us khush-khisal ki Shah-e-Halab se ja ke tu izhar kijiyo In tuhfon par tu Fatiha Akbar ka dijiyo