Basta — Page 216

Luta gaya jo Aal-e-Muhammad ka karwan 1 Luta gaya jo Aal-e-Muhammad ka karwan Afsurda-o-malul Haram mein thin bibiyan Uthta tha dil se Zainab-e-maghmum ka dhuan Tanha zamin par the Imam-e-falak-nishan Sanche mein sabr-o-zabt-o-raza ke dhale hue Chehre pe khak-e-turbat-e-Asghar male hue 2 Yun ho rahi thi Ruh-e-Payambar se guftagu Nana Khuda ne aaj kiya mujhe surkh-ru Islam ko mita na sake din ke adu Batil ke dil mein reh gayi napak arzu Kya ahmar hai chehra-e-Haq dekh lijiye Gul-rang hai zamin ka waraq dekh lijiye 3 Is ka nahin malal ke khud tishna-lab hain hum Sahil pe hai gara hua Abbas ka alam Tarikh-e-rozgar pe hai khun se raqam Saqqa-e-Ahl-e-Bait ke bazu hue qalam Reti par ek nishan-e-wafa sabt reh gaya Pani ke sath khun-e-Alamdar beh gaya 4 Akbar ke zakhm-e-sina se ubla jo lahu Us ne barhai aap ke waris ki aabru Aisi jawan maut ke rone lage adu Aisi ajal ki hogi, farishton ko arzu Rishta-e-Khuda se aur rag-e-gardan kati hui Kya saj rahi thi khak se zulfen kati hui 5 Kis shan se shahid hua Qasim jawan Naushah jaise koi chala ho su-e-jinan Sehre ke phul husn-e-amal ke fasana-khwan Ek ek zakhm, zauq-e-shahadat ki dastan Islam sarbuland hua, is inhak mein Apna shabab aap milaya hai khak mein 6 Dekha hai sab ne Aun-o-Muhammad ka shauq-e-jang Kaisi shahid hone ki donon mein thi umang Donon ki ek shan thi, donon ka ek dhang Donon jama gaye dil-e-batil pe apna rang Donon se maut aa ke ham-aghosh ho gayi Zainab ki maamta bhi tah-e-khaak so gayi