Basta — Page 223

Jab ran mein qatl fauj-e-Shah-e-Karbala hui 1 Jab ran mein qatl fauj-e-Shah-e-Karbala hui Sibt qatl hue, intiha hui Lekin na khatm Ahl-e-Jafa ki jafa hui Is Karbala ke baad ek Karbala hui Ab tak ye puchhta hai muarrikh Yazid se Ranjish Haram se thi ke Imam-e-Shahid se 2 Asghar ne kya kiya tha ke chheda gaya gala Jurm-e-Sakina kya tha ke durron ki di saza Bimar kis khata par asir-e-jafa hua Zainab ka kya qusur tha kyun chhin li rida Be-bas Rubab takti thi kis dard-o-yas se Ek man ko kyun hataya jhule ke pas se 3 Laye gaye Haram sar-e-darbar kis liye Ruswa kiye gaye sar-e-bazar kis liye Tauq-e-giran-o-gardan-e-bimar kis liye Durron ka zulm, zulm pe israr kis liye Masle gaye jo phul Riyaz-e-Batul ke Kis ko kia tha qatl haram ne Rasul ke 4 Allah! Baad-e-qatl-e-Shahanshah-e-ins-o-jan Kya kya na fauj-e-zulm ki thin bad-lagamiyan Wo qehqahe wo khaimon se utha hua dhuwan Wo bibiyon ka sabr wo bachchon ki siskiyan Dil chirti wo Zainab-e-nashad ki sada Wo ek bahen se bhai ki faryad ki sada 5 Bhaiya tumhare baad aseer-e-jafa hue Khaime jala diye gaye, hum be-rida hue Gustakh kitne aaj ye Ahl-e-Khata hue Hans hans ke puchhte hain ke Abbas kya hue Kehte hain tanz se wo dilawar kahan gaye Qasim ko kya hua, Ali Akbar kahan gaye 6 Bhaiya tumhi batao unhein kya jawab dun Bahnein roti hain, unhein kya keh ke chup karun Khud be-rida hun, kaise gharibon ke sar dhakun Bachchon ko sath le ke main kis ban mein ja chhupun Takid-e-sabr ki thi, main paband isi ki hun Lekin khayal aata hai, beti Ali ki hun