Basta — Page 236

Jab lut ke Karbala se asir-e-sitam chale 1 Jab lut ke Karbala se asir-e-sitam chale Sajjad sar barahna ba-dard-o-alam chale Rote saron ko pitte paband-e-gham chale Zainab ne lash-e-Shah se kaha bhai hum chale Marne se aap ke main ye iza uthati hun Darbar mein Yazid ke sar nange jati hun 2 Hai hai mere musafir-e-Karb-o-Bala Husain Hai hai mere gharib mere mah-liqa Husain Hai hai tujhe na pani ka qatra mila Husain Hai hai tamam tan tera tukre hua Husain Pyase gale pe khanjar-e-bedad chal gaya Hai hai tarap tarap ke tera dam nikal gaya 3 Le Nainawa Ali ki bidaat tujhe mili Ay Karbala Khuda ki amanat tujhe mili Ay khak meri man ki riyazat tujhe mili Le ay zamin shama-e-imamat tujhe mili Daman tera bhara meri kheti ujar gayi Sarhad mein teri bhai se Zainab bichhar gayi 4 Ye keh ke sar ko pit ke roi wo dil-jali Aa kar Najaf se hal mera dekho Ya Ali Gardan rasan mein aap ki beti ke hai bandhi Kehte ye Mariya se wo ba-chashm-e-tar chali Hai hai main Karbala-e-Mualla mein lut gayi Pardes mein, main aa ke baradar se chhut gayi 5 Mehman bula ke hum se wafa ki lainon ne Kya kya na hum pe jaur-o-jafa ki lainon ne Khinchi bhi zara na sharm-o-haya ki lainon ne Gardan jafa se shahr ki Khuda ki lainon ne Khaime jala ke Ahl-e-Sitam shad ho gaye Karbala mein Aal ke barbad ho gaye