Basta — page 242 | Kalam Archive

View

Text sizeLine spacing

Original scan of Basta page 242 — Original book page

Roman Urdu

Urdu text

4 Utri ye kehte hue koh se Shirin nagah Sab khushi ke pukare ke wo hai lashkar-e-Shah Gaur se tham ke jo, ki char taraf us ne nigah Dur se nazar aaye alam-haye siyah Gham ka saman tha jidhar ankh utha kar dekha Daman-e-koh mein utra hua lashkar dekha 5 Boli ghabra ke wo logo, koi dekho to ba-gaur Ye to hai saf sipah-e-hasad-o-kina-o-jaur Mutlaqan in mein jawanan-e-Arab ke nahin taur Fauj-e-Shimr kahan, ye to hai lashkar koi aur Un ko dikhla do mujhe jin ki talabgari hai Alam sabz hai na khaima-e-zarkari hai 6 Dil kuchh is waqt pareshan hai, Khuda khair kare Muztarib tan mein meri jaan hai, Khuda khair kare Chashm mein ashkon ka tufan hai, Khuda khair kare Ye to kuchh aur hi saman hai, Khuda khair kare Khabar-e-Sibt-e-Nabi dekhiye kya aati hai Mere kanon mein to rone ki sada aati hai 7 Sab ko tashwish hui sun ke ye Shirin ka bayan Ek kaniz us ki gayi aage the wo log jahan Sab se puchha, ye na paya alam-e-din ka nishan Chand chehre nazar aaye kai bala-e-sinan Gird-e-sawaron liye fauj-e-sitam ko dekha Nange sar qafila-e-Ahl-e-Haram ko dekha 8 Ashk ankhon mein bhare, wan se phiri wo ghamgin Aur izhar kiya aa ke ye Shirin ke qarib Aap sach kehti thin Bibi, ye to hai lashkar-e-kin Umar-e-Saad hai aur fauj-e-Yazid-e-be-din Karbala hai koi ja, waan se ye sab aate hain Kisi sardar ka sar kat ke le jate hain 9 Bibiyan khak pe baithi hain hazin-o-khun-ru Rukh hain mitti se bhare, mathe se behta hai lahu Qatl waris hue aur rone ke mane hain adu Ek rassi mein hain jakre hue donon bazu Asman palta hai in bibiyon ke nalon se Munh koi hath se dhanpe hai, koi balon se

۴ اُتری یہ کہتے ہوئے کوہ سے شیریں ناگاہ سب خوشی کے پکارے کہ وہ ہے لشکرِ شاہ غور سے تھم کے جو، کی چار طرف اُس نے نگاہ دُور سے نظر آئے عَلَم ہائے سیاہ غم کا ساماں تھا جدھر آنکھ اٹھا کر دیکھا دامنِ کوہ میں اُترا ہُوا لشکر دیکھا ۵ بولی گھبرا کے وہ لوگو، کوئی دیکھو تو بغور یہ تو ہے صاف سپاہِ حسد و کینہ و جور مطلقاً ان میں جوانانِ عرب کے نہیں طور فوجِ شمر کہاں، یہ تو ہے لشکر کوئی اور ان کو دکھلا دو مجھے جن کی طلب گاری ہے علم سبز ہے نہ خیمۂ زرکاری ہے ۶ دل کچھ اس وقت پریشان ہے، خدا خیر کرے مضطرب تن میں مری جاں ہے، خدا خیر کرے چشم میں اشکوں کا طوفاں ہے، خدا خیر کرے یہ تو کچھ اور ہی ساماں ہے، خدا خیر کرے خبرِ سبطِ نبیؐ دیکھئے کیا آتی ہے میرے کانوں میں تو رونے کی صدا آتی ہے ۷ سب کو تشویش ہوئی سن کے یہ شیریں کا بیان اک کنیز اس کی گئی آگے تھے وہ لوگ جہاں سب سے پوچھا، یہ نہ پایا علمِ دیں کا نشان چاند چہرے نظر آئے کئی بالائے سناں گردِ سواروں لئے فوجِ ستم کو دیکھا ننگے سر قافلۂ اہلِ حرم کو دیکھا ۸ اشک آنکھوں میں بھرے، واں سے پھری وہ غمگیں اور اظہار کیا آ کے یہ شیریں کے قریب آپ سچ کہتی تھیں بی بی، یہ تو ہے لشکرِ کین عمرِ سعد ہے اور فوجِ یزیدِ بے دیں کربلا ہے کوئی جا، واں سے یہ سب آتے ہیں کسی سردار کا سر کاٹ کے لے جاتے ہیں ۹ بیبیاں خاک پہ بیٹھی ہیں حزیں و خوں رو رخ ہیں مٹی سے بھرے، ماتھے سے بہتا ہے لہو قتل وارث ہوئے اور رونے کے مانع ہیں عدو ایک رسی میں ہیں جکڑے ہوئے دونوں بازو آسماں پلٹا ہے ان بیبیوں کے نالوں سے منہ کوئی ہاتھ سے ڈھانپے ہے، کوئی بالوں سے