Basta — Page 296

Jis dam Hasan ka zahr se tukre jigar hua 1 Jis dam Hasan ka zahr se tukre jigar hua Sipara-e-dil wo aahon se zer-o-zabar hua Sam ka jo Ruh-e-Pak pe zahir asar hua Hal us Imam-e-Pak ka ek dam digar hua Rahat mein farq aur shikam mein khalal para Kat kar kaleja tasht mein andar nikal para 2 Farmate the Hasan ke bulao Husain ko Tha dam-ba-dam ye hukm ke lao Husain ko Bhai ka hal-e-zar sunao Husain ko Tukre mere jigar ke dikhao Husain ko Keh do ke jald aaye rehlat ka waqt hai Sun jaye kuchh ke wasiyat ka waqt hai 3 Aaye Husain itne mein ba-chashm-e-ashkbar Chillate the ke aap ki ghurbat ke main nisar Shabbir ko chum ke kehte the bar bar Main tum pe sadqe ay mere Nana ki yadgar Mujh se zyada zulm-o-sitam tum pe honge Hum qabr mein tumhari musibat pe royenge 4 Barpa tha Ahl-e-Bait-e-Payambar mein shor-o-shain Bahnein pachharen khati thin kar ke bain Sine pe hath mar ke chillate the Husain Ab uth gaya zamane se hum be-kason ka chain Bazu hamara tut gaya wa musibata Bap aaj hum se chhut gaya wa musibata 5 Bhaiya tumhari god mein niklega mera dam Tum doge hum ko ghusl-o-kafan jab marenge hum Hoga tumhare pas na koi bajuz alam Qatil sirhane hoyega ya khanjar-e-sitam Shabbir to baad-e-marg bhi rahat se soyega Lash tumhara ghoron se pamal hoyega Bashukriya sozkhwan Jawad Husain o Muhammad Ali o Haider Ali Zaidi Qaisar Barahvi Ehsas-e-gham-o-dard mein dhal jata hai Insaf ka waraq ruh par charh jata hai Jab kehta hai ghurbat ki kahani koi Muslim ke yatimon ka khayal aata hai