Basta — Page 303

Para hai ghash mein Husain gharib ka jani 1 Para hai ghash mein Husain gharib ka jani Munh hai khushi mein zulm-o-jaur ke bani Dam-e-namaz jo chaunka ye Haider-e-Sani Wuzu ke waste uth kar talab kiya pani Jo pani aaya to munh se ansuon se dhone lage Phir hi nigahon mein Baba ki pyas, rone lage 2 Tarap ke dil ne kaha haye Syed-e-khush-khu Yahi to hai jo mila tin din jo bahr-e-wuzu Isi ki chah mein Kausar ko chale paye mehru Isi ke waste Ammu ke kat gaye bazu Yahi to wo hai jo be-shir ne na paya tha Isi ko mang ke gardan pe tir khaya tha 3 Gharaz ke aaye musalle par aur parhi wo namaz Ke jis ke baad thi hadd-e-wisal-e-naz-o-niyaz Har ek zikr-e-tawil aur har ek sujud-e-daraz Pukarti thi ye Ruh-e-Husain-e-sajda-nawaz Mujhe bhi naz hai jis par yahi wo taat hai Ye aakhri mere Sajjad ki ibadat hai 4 Hui tamam jo aakhir namaz-e-jaan-e-Rasul Dua-o-hamd ke lab chumta tha husn-e-qubul Diya jo shukr ke sajde ko Haq ki yaad mein tul To ek asr ka yaad aaya sajda-e-maqbul Uthe jo rote hue koch kar gaye Sajjad Kaha Husain Husain aur mar gaye Sajjad 5 Uthai daur ke Baqir ne lash ro ro kar Tamam bibiyan matam mein pitne lagin sar Muhalla-e-Bani Hashim mein ghul macha ghar ghar Utha jahan se azadar-e-Sibt-e-Payambar Phata wo Aal se jo aasra tha ghurbat ka Bujha chiragh-e-Shah-e-Karbala ki turbat ka 6 Nabi-o-Haider-o-Zahra ki ruh hai nashad Husain ka hai ye nauha ke haye ay Sajjad Batul kehti hain ro ro ke Ya Khuda faryad Sahegi dahr mein kya kya sitam meri aulad Jafa se qatl jigar-o-qahr se mara Mere mariz ko zalim ne zahr se mara Para hai ghash mein Husain gharib ka jani Nasim Amrohvi