Basta — Page 102

Josh Malihabadi Ashna bahr-e-sadaqat ka Husain Ibn-e-Ali Madrasa-e-dars-e-shahadat ka Husain Ibn-e-Ali Mojiza-e-fikri najabat ka Husain Ibn-e-Ali Hausla teri nabuwwat ka Husain Ibn-e-Ali Jis ne bujhne di na shama-e-adamiyat, wo Husain Sans jis ke dam se leti hai mashiyat, wo Husain (Bashukriya qari o sozkhwan Raza Maulai o Muhammad Ali Maulai)

Jab chaman khak mein Akbar ki jawani ka mila Pani pani kaha aur qatra na pani ka mila Dagh Syedaniyon ko Ahmad-e-Sani ka mila Shah ko kuchh na pata Bano ke jani ka mila Ro ro farmate the taqat hai na binai hai Beta mara gaya aur alam-e-tanhai hai (Bashukriya sozkhwan Zafar Husain Zaidi o Sibt Muhammad Rizvi)

Ya Rab saghir sin mein koi be-pidar na ho Baba kisi ka qatl huzur-e-nazar na ho Pardes mein yatim koi dar-badar na ho Balwe mein koi parda-nashin nange sar na ho Qaidi hui pidar se chhuti bhai mar gaye Ye sare dukh Sakina ke upar guzar gaye (Bashukriya sozkhwan Iqlim Akhtar Zaidi o Iwaz Ali)

Abbas ko Husain jo darya pe ro chuke Bhai se apne hath lab-e-nahr dho chuke Yan tak ke qatl, Akbar-o-Asghar bhi ho chuke Godi mein jo pake the wo mitti mein so chuke Girte the Shah har ek tan-e-pash-pash par Qasim ki lash par kabhi Akbar ki lash par (Bashukriya sozkhwan Hasan Kazmi o baradaran)

Rula rahi hai dilon ko luti hui Sarkar Na paidalon ke pare hain na markabon ki qatar Ujar gaya wo chaman aur khizan hui wo bahar Na koi hajib-o-darban na koi khidmatgar Maqam-e-hu, ka hai jis ja nigah murti hai Huzur ke dar-e-daulat pe khak urti hai (Anjumani Bab-ul-Ilm / prashad peshtar)

Be-chain thi Sughra jo firaq-e-pidari se Uth uth ke tahalti thi nasim-e-sahari se Ay bad-e-saba marti hun dard-e-jigari se Mil jayen to kahiyo mere baba safari se Nargis ki tarah chashm su-e-dar nigran hai Jald aao ke hasti ka chaman sarf-e-khizan hai