Basta — Page 103

Taslim Amrohvi Dulha bana jo Bano-e-Sarwar ka be-zaban Zainab balayen lene lagin ho ke nim-jan Munh chum kar jo sab ne dua di ba-sad-fughan Asghar ka hath mathe pe rakh kar pukari man Lo bibiyo, ab apne kalejon ko tham lo Rukhsat talab hai Asghar-e-nadan salam lo (Bashukriya sozkhwan Zafar Abbas o Intizam Husain)

Rehan Azmi Asghar ki lash jab ke uthai Husain ne Dekhi ba-ghaur apni kamai Husain ne Phir lash asman ko dikhai Husain ne Taqrir ye zamin ko sunai Husain ne Le ay zamin meri amanat sambhal le Main saunpta hun ab tujhe Bano ka lal, le (Bashukriya shair o nauhakhwan Muzaffar Haider Zaidi / Pakrali)

Jab zuhr tak Husain bahattar ko ro chuke Ek dopehar mein chhote se lashkar ko ro chuke Qasim ko ro chuke Ali Akbar ko ro chuke Turbat bana ke nanhi si Asghar ko ro chuke Syedaniyon ne ro ke kaha shor-o-shain se Lo ab zamana hota hai khali Husain se (Bashukriya sozkhwan Syed Hasan Abbas Zaidi / Achhi)

Tha hukm ye Yazid ka pani bashar piyen Ghore piyen, sawar piyen aur shutar piyen Jo tishna-lab jahan ke hain wo be-khatar piyen Yan tak ke sab charand-o-parand aan kar piyen Kafir bhi gar piyen to na tu mana kijiyo Par Fatima ke lal ko pani na dijiyo (Bashukriya sozkhwan Wahid Husain Zaidi)

Kehti thi Bano Asghar-e-jani kab tum ghar mein aaoge Darya par se pi kar pani kab tum ghar mein aaoge Ay mere jani Yusuf-e-sani kab tum ghar mein aaoge Apni dikhane shakl namani kab tum ghar mein aaoge Sog mein tere beta main ne pehni kafni kali hai Bhure balon wale aaja, jhula tera khali hai (Bashukriya Maulana Akhtar-ul-Husain Zain-ud-Din-ul-Husaini Muhammadi)

Jab Zulfiqar-e-matam-e-Asghar mein ro chuki Nanhi si qabr khod ke khunbar ho chuki Bachche ke sath Bano ki qismat ko so chuki Girta lahu bhara hua ashkon se dho chuki Pani na tha jo Shah pichhrote mazar par Ansu tapak pare lab-e-shir-khwar par (Bashukriya shair o sozkhwan Sardar Husain Zaidi / Canada, London)