Basta — Page 147

4 Bole peshani pe munh rakh ke Imam-e-do-jahan Kya khafa ho gayin Baba se tum ay rahat-e-jan Ja ke Kufe mein agar maut ne di hum ko aman Wada karte hain ke hum tum ko bula lenge wahan Der mein pahunche sawari to na ghabrana tum Sath nani ke meri jaan chali aana tum 5 Baten karte the ye Sughra se Shah-e-kaun-o-makan Aaye jo itne mein hamshakl-e-Rasul-e-do-jahan Dekh kar bhai ko boli wo ba-sad aah-o-fughan Aao bhaiya Ali Akbar main tumhare qurban Apna kuchh bas nahin Baba to hamein chhor chale Tum bhi kya khwahar-e-nashad se munh mor chale 6 Hum to mehman koi din ke hain na jao bhai Ab yaqin hai ke hamein aa ke na pao bhai Lo mujhe zulf-e-saman-bu ki sunghao bhai Lun balayen main zara pas to aao bhai Alam-e-hijr mein duniya se safar karte hain Koi hasrat to na reh jaye ke hum marte hain 7 Khak par gir ke tarapne lagi wo khasta-jigar Ru-e-bimar ko sine se laga kar Sarwar Dil jo bhar aaya Sakina ka pukari ro kar Apna kuchh bas nahin Allah nigahban khwahar Chhut ke hum tum se ba-sad ranj-o-alam jate hain Lo bahen aa ke gale mil lo ke hum jate hain [Bashukriya sozkhwan Professor Syed Ali Zakir o Tanzim Naqvi]