Basta — Page 161

4 Shah rone lage Zainab ko jo dekha be-tab Shahr-e-Bano ne kiya Shah se ro kar ye khitab Haq mein laundi ke hai kya hukm, Shah-e-Arsh Janab Aap farmayen to pakrun ghore ki rikab Yun gawara hai mujhe faqa pe faqa Sahib Aap ke dam se main rakhti hun ilaqa Sahib 5 Ro ke farmane laga Haider-e-Karrar ka lal Ran mein jab huegi kheti mere jadd ki pamal Bano tujh ko hai abas apni tabahi ka khayal Jo meri bahnon ka ahwal wohi tera hal Biwa hona hai tujhe aur mujhe be-sar hona Bint-e-Zahra ki itaat se na bahar hona [Makhaz: Jis ghari nahr pe khaime Shah-e-wala ke hue]

Jis dam suni Imam-e-Umam ne sada-e-Hurr 1 Jis dam suni Imam-e-Umam ne sada-e-Hurr Sine pe hath mar ke chillaye haye Hurr Ro kar kaha rafiqon se dekhi wafa-e-Hurr Farsh-e-aza Haram ne bichhai baraye Hurr Khinchi jo Shah ne aah, dil-e-be-qarar se Niklin tarap ke Fatima Zahra ke mazar se 2 Daure idhar se ran ki taraf Syed-e-Umam Aaye Najaf se Haider-e-Safdar chashm-e-nam Awaz di Nabi ne ke Hurr ko liye hain hum Jis waqt pahunche Shah to wo torta tha dam Sar katne ki fikr mein jo the wo hat gaye Mehman se apne daur ke Hazrat lipat gaye 3 Zanu pe rakh liya sar-e-Hurr aur ye kaha Bhai Husain aaya hai aa hosh mein zara Ankhen qadam pe mal ke ye bola wo bawafa Maula hazar jaan se main aap par fida Jin ke liye zamin pe malaik sar jhukate hain Wo log Khuld se mere lene ko aate hain