Basta — Page 181

Ghore se jabke Qasim gulgun qaba gira 1 Ghore se jabke Qasim gulgun qaba gira Ghul par gaya ke nabira-e-Mushkil-kusha gira Khun mein naha ke lakht-e-dil-e-Mujtaba gira Girte hi fauj-e-zulm ka majma baham hua Zakhmi par aah-e-nara-e-fauj-e-sitam hua 2 Mara kisi ne pusht pe neze ko tan ke Khatki sinan-e-zulm kaleje mein aan ke Koyi tabar laga gaya mazlum jaan ke Tigha kisi ka chal gaya sar par jawan ke Pahlu bhi donon hath bhi yaksar figar the Dulha ka ek jism tha harbe hazar the 3 Hazrat ko di sada ke chacha jaan aaiye Khadim hua Huzur pe qurban aaiye Duniya mein koi dam ka hun mehman aaiye Sar katne ka hota hai saman aaiye Jallad pahunche tigh-e-do-paikar liye hue Qatil khare hain hath mein khanjar liye hue 4 Dam torne laga jo ye keh kar wo dil-figar Tabl-e-zafar baja saf-e-aada mein ek bar Daure idhar se tigh-ba-kaf Shah-e-namdar Ghoron se rondne lage lashe ko wo sawar Sab ghere ghore sine pe nur ho gaya Tapon se markabon ki badan chur ho gaya 5 Pahunche Husain lash pe jis dam ba-chashm-e-nam Aata hua tha ankhon mein Ibn-e-Hasan ka dam Sar apna pit kar ye pukare Shah-e-Umam Qasim utho ke aaye hain milne ko tum se hum Mozun na aa gayi Fatima ke nur-e-ain se Baten to kuchh karo dam-e-aakhir Husain se 6 kiya bolte ke maut ne tha be khabar kia sidhi na aankh ki na munh apna udhar kia hichki ke dard ne tah-o-bala jigar kia bas muskra ke bagh-e-jahan se safar kia hazrat chale utha ke tan-e-paash paash ko kandha diya chacha ne bhatije ki lassh ko