Basta — Page 205

Jab qatl ran mein ho chuka lashkar-e-Husain ka 1 Jab qatl ran mein ho chuka lashkar-e-Husain ka Baqi raha na nasir-o-yawar Husain ka Dushman jo tha har ek sitamgar Husain ka Ghul par gaya ke kat lo ab sar Husain ka Pyase pe abr-e-Sham ke lashkar ne chha gaya Mazlum Ahl-e-Zulm ke narghe mein aa gaya 2 Kehta tha koi tir lagao Husain ko Talwaron se lahu mein dubao Husain ko Kehta tha Shimr, gher ke lao Husain ko Ghore se jald niche girao Husain ko Kya chupke dekhte ho munh is tishna-kam ka Sar kat lo Husain alaihissalam ka 3 Jab tir aa ke lagta tha jism-e-Husain par Khaime ko takte jate the munh pher pher kar Kehte the dil se ro ke Shahanshah-e-bahr-o-bar Zainab kahin na khaime se nikle barahna sar Bano ko ay Karim mere gham mein sabr de Zainab ko ay Khuda mere matam mein sabr de 4 Zainab ne apne bhai ki jab ye sada suni Ghabra ke aai deorhi par wo gham ki mubtala Dekha ke Shah ko ghere hai sab fauj-e-ashqiya Ummat ki maghfirat ki hain Shah kar rahe dua Koi qarib aa ke hai shamshir marta Aur jism-e-pak par hai koi tir marta 5 Zainab pukarin tir pe mujh pe lagao tum Bhai ke badle khun mein mujh ko dubao tum Neze pe kat kar mere sar ko charhao tum Farzand-e-Fatima pe na ab hath uthao tum Pani ko tin roz se mahrum hai Husain Syed hai be-gunah hai mazlum hai Husain Jab qatl ran mein ho chuka lashkar Husain ka Azmat Balgrami Kar ke wuzu nazar ne sharab-e-tahur se Dekha jamal-e-ru-e-Muhammad ghurur se Tahzib-o-fan, tamaddun-o-akhlaq-o-agahi Sibtain ke bhik mang rahe hain huzur se