Basta — Page 218

Gharat-e-khaima-e-Sarwar ko jab aaye aada 1 Gharat-e-khaima-e-Sarwar ko jab aaye aada Nangi talwaren liye be-adab aaye aada Shor bibiyon mein hua, be-ghazab aaye aada Koi waris na raha sar par tab aaye aada Aas ab kis ki hai kaun aah bachaye hum ko In jafakaron se Allah bachaye hum ko 2 Mili bibiyan thin faryad ke hum lutte hain Ay Khuda tere Payambar ke Haram lutte hain Aaj be-jurm ye paband-e-alam lutte hain Yun musafir kabhi pardes mein kam lutte hain Aag parde ki qanaton mein laga di hai hai Masnad-e-Ahmad-e-Mukhtar jala di hai hai 3 Thin bapa Aal-e-Nabi mein ye fughan-o-zari Itne mein rakh huin jal ke qanatein sari Nikle maidan mein ghabra ke Haram-e-Akbari Barchhiyan tane hue gird the un ke nari Dar se sine mein kisi Bibi ki sans urti thi Larkhara kar koi bachcha liye gir parti thi 4 Pai gharat se jo aada ne faraghat Akbar Umar-e-Saad se ek Shami ne ye ki guftar Lut chuki Badshah-e-kaun-o-makan ki sarkar Koi shai ke lashkaron ne ab nahin chhori zinhar Haram-e-Shah mein ab aur to kya baqi hai Sar par bibiyon ke bas ek rida baqi hai 5 Shimr bola ke ridaon ko bhi lo jald utar Nahin hakim ke gunahgaron ko parda darkar Sar barahna rahen namus-e-Rasul-e-Mukhtar Be-kasaon ke jo hon unt karo un pe sawar Qatl waris huwe dehshat hamein kia hai in ki Jitna ro ro ke ye chillayen saza hai in ki 6 Sar-e-Zainab se rida lene lage jab azlam Thartharai thi zamin, palta tha Arsh-e-Azam Ro ke wo kehti thi ay zalim zara ki qasam Maryam-o-Hajra se martaba mera nahin kam Ghazab-e-Haq se kahan bach ke nikal paoge Aah ek aisi karungi ke jal jaoge