Basta — Page 247

4 Niklin sar nange khwasaan-e-muqarrab, hamrah ta ba aflaak gaya ghulgha-e-naala o aah Pahunchin darbar mein jis waqt wo ba-hal-e-tabah Gir pari daur ke Shabbir ke sar par nagah Ro ke chillai ke is shakl par qurban gayi Mere Aqa ka yahi sar hai main pehchan gayi 5 Yak-ba-yak takht se ghabra ke utha hakim-e-Sham Dal kar Hind ke daman pe kiya us ne kalam Mujh ko ruswa kiya, aisa bhi koi karta hai kam Us ne daman ko ulat kar kaha o bad-anjam Be-rida Zainab-o-Kulsum hain, waswas nahin Pas mera hai, Nabi-zadiyon ka pas nahin 6 Kis ki beti hai ke sar par nahin jis ke chadar Ye bahu kis ki hai jo baithti hai nange sar Kis ke namus hain jo rote hain yun chilla kar Haye kyun phat ke falak gir nahin parta tujh par Tauq-o-zanjir ko aur Abid-e-dilgir ko dekh Rasan-e-zulm ko aur Shah ki hamshir ko dekh 7 Ye rasan aur ye nanha sa Sakina ka gala Koi aisi bhi badi karta hai nekon se bhala Us ki beti hai jo aghosh-e-Muhammad mein pala Kya qayamat hai, ye bachpan ye asiri ki bala Hath bandhane se hasil, zara kya lete hain Rahm karte hain yatimon pe ke dukh dete hain 8 Hind se apni tarafdari ki sun kar guftar Pas us ke gayi, chillai Sakina ek bar Tere qurban main ay Aal-e-Nabi ki ghamkhwar Khol de aa ke mere hath, hain rassi se figar Ab to wajib hai asiron pe duaen teri Nanhe se haathon se lun gi main balaein teri 9 Main Sakina hun Husain Ibn-e-Ali ki dukhtar Be-gunah Shimr ne kata hai mere bap ka sar Haye jis sine pe soti thi main thi khugar Ghore dauraye lainon ne isi sine par Dekhiye nil hain galon pe hamare Bibi Shimr zalim ne tamanche hamein mare Bibi