Basta — Page 248

Amad hai Ahl-e-Bait-e-Payambar ki Sham mein 1 Amad hai Ahl-e-Bait-e-Payambar ki Sham mein Gesu khole hue hain aza-e-Imam mein Sar pitti hain Fatima Dar-us-Salam mein Zainab ye nauha karti hain balwa-e-aam mein Logo khabar karo mere Nana Rasul ko Balwa-e-Shimr laya hai Bint-e-Batul ko 2 Nana teri nawasi ke sar par rida nahin Aur Ahl-e-Sham dekhte hain, kuchh haya nahin Abid gharib marta hai tap se dawa nahin Behosh nanhe bachche hain, aab-o-ghiza nahin Dil sab ke kanpte hain, badan thartharate hain Ab samne Yazid ke Sadat jate hain 3 Hain ek rasan mein barah gale, wa musibata Rote hain godiyon ke pale, wa musibata Bas mein sitamgaron ke chale, wa musibata Khak-e-aza mein munh par male, wa musibata Mushkil qadam uthana tha is izdeham mein Yun Itrat-e-Nabi ki balwa-e-aam mein 4 Zainab tarap ke unt par karti thi ye bayan Darbar mein talab hue Sadat nagahan Unton se utrin bibiyan keh keh ke al-aman Pesh-e-Yazid le gaye zalim kashan kashan Saman-e-jashn-e-aam tha darbar-e-aam tha Aur nange sar Husain ka kunba tamam tha 5 Hairaan khare the sab Haram-e-Shah-e-Mashriqain Muhr-e-sukut lab pe thi shikwa na shor o shain Zainab ne dekha tasht mein nagah sar-e-Husain Be-sakhta tarap ke ye kehne lagi wo bain Hai hai na maut aai mujhe rah-e-Sham mein Bhaiya mera salam lo darbar-e-aam mein