Basta — Page 271

Yasrib se Karbala ke musafir qarib hain 1 Yasrib se Karbala ke musafir qarib hain Lut kar phire watan ko ajab gham-nasib hain Is hal se Habib-e-Khuda ke Habib hain Be-kas hain sogwar Imam-e-Gharib hain Hazrat ke baad chain ki shaklein bigar gayin Shahzadiyan ghazab ki tabahi mein par gayin 2 Sab shahr mein ajab talatum hai ja baja Sughra ko fart-e-gham se nahin hosh dast-o-pa Leti hui hai sahn mein munh par liye rida Sine mein dil dharakne laga jab chali hawa Kehti hai khalq se isi hasrat mein jayenge Kyun dil kabhi hamare musafir bhi aayenge 3 Uthi ye keh ke ashiq-e-Sultan-e-Namdar Lekin qadam qadam pe giri wo nahif-o-zar Be-ikhtiyar hans ke ye chillai ek bar Lo Nani main to jati hun tum ghar se ho hoshiyar [Ek misra juzwi taur par ghair wazeh] Lo tum pe fida mere Baba Husain aaye 4 Sughra idhar se pitti pahunchi ba-chashm-e-tar Umm-ul-Banin bhi hathon se thame hue jigar Puchha kidhar hain khwahar-e-Sultan-e-bahr-o-bar Fizza ne barh ke Hazrat-e-Zainab ko di khabar Zauja-e-Rasul-e-Pak ki tashrif lai hain Umm-ul-Banin bhi aai hain Sughra bhi aai hain 5 Matam ki saf ke pas jo pahunchi wo nek-naam Rone lagin pukar ke Syedaniyan tamam Kulsum barh ke paye tazim chand gam Uthin ek aah khinch ke Zainab paye salam Girne lagin to bazu-e-Fizza pakar liya Sughra ko dekhte hi kaleja pakar liya 6 Sughra ke munh ko dekh ke rote the sab ke sab Bimar le ke naam-e-pidar pitti thi jab Kehti thi mil ke hath ghazab hua ghazab Beti bahut udas hai Baba bulao ab Riqqat hui na zabt kanizon se hat gayin Sughra se uth ke Hazrat-e-Zainab se lipat gayin (Bashukriya sozkhwan Huzur Baradaran o Zuhur Baradaran)