Basta — Page 96

Har daur ke naqib hain Quran-o-Ahl-e-Bait Insan ka nasib hain Quran-o-Ahl-e-Bait Allah ke qarib hain Quran-o-Ahl-e-Bait Mahbub ke Habib hain Quran-o-Ahl-e-Bait Haq Ahl-e-Bait ka hai Khuda ki kitab par Lakhon durud Aal-e-Risalat Maab par (Bashukriya sozkhwan o shair Naqviya, fidwi Sikandar Zaidi / Bolan)

Banda hazar sal ibadat agar kare Aur zar ba-qadr-e-koh-e-Uhud rah-e-Haq mein de Hajj bhi piyada pa jo hazar us ne hon kiye Aur be-gunah qatl ho wo zulm-o-jaur se Hubb-e-Ali ki mai nahin gar dil ke jam mein Jannat ki bu na pahunchegi hargiz masham mein (Bashukriya sozkhwan Asad Naqvi baradaran o Syed Tanvir Haider)

Maryam se bhi Batul ko rutba siwa mila Baba use Rasul sa Khair-ul-Wara mila Beta har ek Shahid-e-rah-e-Kibriya mila Shohar mila to khalq ka uqda-kusha mila Har ek apne martabe mein intikhab hai Zahra hai be-misal Ali lajawab hai (Bashukriya salam o nauhakhwan Iftikhar Ali Bahari Khan)

Chashm-e-Nabi ke khwab ko kehte hain Sayyida Ismat ke aftab ko kehte hain Sayyida Quran ke jawab ko kehte hain Sayyida Munh bolti kitab ko kehte hain Sayyida Ye zat yun kitab ki tafsir ban gayi Lafzon mein dhal ke Ayah-e-Tathir ban gayi