Basta — Page 99

Jab thori rat qatl ki maidan mein reh gayi Aur al-firaq aa ke saba ran mein keh gayi Hamshir-e-Shah-e-din ki falak par nigah gayi Mehndi lahu ki dida-e-purnam se bah gayi Jun jun ghari judai ki nazdik hoti thi Munh dhanp dhanp Zainab-e-nashad roti thi (Bashukriya soz o salam khwan Mazhar Husain Naqvi)

Ashur ki jo rat thi mahshar-sifat thi Be-kas musafiron pe qiyamat ki rat thi Fauj-e-shaqi lagaye hue apni ghat thi Masdud tin roz se rah-e-Furat thi Kehti thi ye Sakina, taras hum pe khaiye Marte hain hum, chacha hamein pani pilaiye

Jab Bano ne ran ki Ali Akbar ko raza di Us Ghazi ko marne ki nihayat hui shadi Khaime se nikal bap ko jine ki dua di Aur paon pe gardan, Shah-e-be-kas ke jhuka di Shah bole ke hum samjhe, jo hai dhyan tumhara Pyare mere Allah nigahban tumhara (Bashukriya sozkhwan Kirdar Husain Naqvi o Abbas Sahib)

Barchhi ki ani jab lagi Akbar ke jigar mein Aur mar gaya dam tor ke aghosh-e-pidar mein Shah ne kaha kis taur tujhe le chalun ghar mein Bazu mein na taqat hai na quwwat hai jigar mein Le jana teri lash ka dushwar hai beta Sar apna bhi tan par ye mujhe bar hai beta (Bashukriya sozkhwan Syed Nazir Husain Naqvi o Haider Ali Zaidi)

Husain jab ke chale baad-e-dopehar ran ko Na tha koi ke jo thame rikab-e-tausan ko Husain chupke khare the jhukaye gardan ko Sakina jhar rahi thin qaba ke daman ko Na aasra tha koi Shah-e-Karbalai ko Faqat bahen ne kiya tha sawar bhai ko (Bashukriya sozkhwan Syed Ghulam Abbas Naqvi, Muhammad Taqi Amrohvi)

Asr ka waqt hai munis hain na yawar baqi Na to Qasim hain na Abbas na Akbar baqi Had hai ye ab nahin chhe mah ka Asghar baqi Haif hai reh gaye tanha mere Sarwar baqi Sajde mein aur sitam ye tah-e-aflak hua Momino khatm-e-gham-e-Panjtan-e-Pak hua (Bashukriya Farrukh Ali Syed Hasan Raza Sanganvi, Zakir Ali Wasti Rizvi)